काठमाडौं, पुस ९। मन्त्रिपरिषदको आज बसेको बैठकले काँग्रेस सभापति गिरिजाप्रसाद कोइरालालाई नोवेल शान्ति पुरस्कारको लागि सिफारिस गर्ने निर्णय गरेको छ। सिंहदरवारमा बिहीबार विहान बसेको बैठकले शान्तिप्रक्रियामा कोईरालाले गर्नुभएको योगदानका कारण उहाँलाई नोवेल शान्ति पुरस्कारको लागि सिफारिस गरेको जनाईएको छ।
यसैगरि मानव अधिकार उल्लंघन गरी द्वन्द्वकालमा भैरवनाथ गणबाट ४९ जना बन्दी बेपत्ता पारेको आरोप लागेका नेपाली सेनाका उपरथी तोरण जङ्गबहादुर सिंहलाई बलाधिकृत रथीमा बढुवा गर्र्ने निर्णय गरेको छ। विवादित सिंहलाई वढुवा नगर्न राष्ट्रिय मानव अधिकार आयोग, मानव अधिकार उच्चायुक्तको कार्यालयलगायतका दुतावासदेखि अन्तराष्ट्रिय संघ संस्थाको विरोधको वावजुत पनि सरकारले बढुवा गरेको छ। बलाधिकृत रथीका रुपमा बढुवा भएपछि उनी नेपाली सेनामा प्रधानसेनापति छत्रमानसिंह गुरुङपछि दोस्रो वरियतामा रहने छन्। रुक्माङगद कटवाल प्रधानसेनापति हुँदा दोस्रो वरियतामा रहेका कुलबहादुर खड्काको अवकाशपछि यो पद खाली रहेको थियो। यद्यपि, प्रधानसेनापति अमेरिका र भारतको भ्रमणमा जाँदा कार्यवाहक प्रधानसेनापतिको जिम्मेवारी सरकारले सिंहलाई नै सुम्पेको थियो।
यसैगरी बैठकले अनमीनको म्याद ६ महिना थप्ने निर्णय गर्नुका साथै अछाममा आफ्नै सहकर्मीद्वारा बलात्कृत सुन्तली थामीको घटना छानवीन गर्न छानवीन समितिको गठन गर्ने निर्णय गरेको छ। मन्त्रिपरिषदको बैठकले रुकुमकी पत्रकार टीका विष्टलाई उपचारस्वरुप तीन लाख रुपैंया सहयोग गर्ने निर्णय गरेको छ।बढुवा भएका रथी सिंहमाथिको भैरवनाथ गण सम्बन्धी विवादबारे प्रधानमन्त्री तथा मन्त्रिपरिषद् कार्यालयका सचिव रामचन्द्रमान सिंहको संयोजकत्वमा गठित तीन सदस्यीय छानविन समितिले छानविन गरी सफाई दिएकाले उहाँको बढुवा भएको बताइएको छ। यसैगरी प्रधानमन्त्रीको यही पुस ११ गतेदेखिको चीन भमणका लागि २५ जनालाई सरकारी खर्चको व्यवस्था गर्ने र आफ्नै खर्चमा जाने गरी जम्मा ३६ जनालाई भ्रमण टोलीमा समावेश गरिने निर्णय भएको छ।
No comments:
Post a Comment